[轉載]生果日報1月10日: 追憶林保全 留下只有思念

ddarcy

生果日報今天有兩篇有關威威SIR的報道, 這是第二篇

殿堂級配音員林保全離世，對於三個年代的小朋友來說是陪伴我們成長的叮噹（現稱多啦A夢）聲逝，對於一代電影迷來說則是最令人懷念的「洪金寶」不再遇見。保全叔聲演生涯多姿多采，他為電影、電視劇、卡通片等人物注入了靈魂，最重要的是他提升了配音人的地位。師傅丁羽接受專訪，細訴引薦林保全入行的點點滴滴；成龍專用配音、同門師兄弟鄧榮銾，也一同懷念與保全叔同配「洪金寶」的歲月；與保全叔一同為《多啦A夢3D》配音的大雄媽媽陳安瑩，更為故人泣不成聲。
懷念叮噹聲，只為我們都是大雄。
撰文：何永寧、藍文浩、嵐山                                    

【師傅】丁羽：認真的大弟子
資深配音領班丁羽是林保全師傅，當年就是他在TVB替林保全面試，丁羽叔說：「最基本係試聲啦，嗰時聽覺得『咦，把聲OK喎』，個肥仔聲底好肥。最後喺60幾人之中揀咗佢同另外3個學員。」回想起來已經是30餘年前的事，雖然丁羽叔早前喪偶，原本白事相沖，他不宜出席徒弟的喪禮，他說：「同佢嘅感情冇得講，我仲係佢囡囡契爺，所以點都好，都好想喺靈堂同保全say goodbye。」

為一句語氣重配
丁羽形容大弟子的林保全一向沉默寡言，但做事很認真有責任心：「我喺配音界中嘅外號叫『鬼門關』，我把過關嘅電影配音都冇乜走雞。不過好多時我冇問題，反而係負責配音嘅保全自己提出配過條聲，可能只係一兩個音嘅語氣咁小事。」當年電影配音一般是將影片剪成100呎一條逐條配音：「以前一條片配錯一隻字要成條配過，所以好多行家都好怕『守尾門』配最後一段，因為一錯就要成段嚟過俾同事埋怨，所以保全主動要重配，表示佢對份工好認真。」
丁羽叔笑言配音員與演員一樣，都是演路人甲開始：「記得保全第一句對白都係類似『係』、『哦』同埋『知道』，不過佢上手快，好快就正式埋咪。」行內亦有一樣不成文規矩，肥人配肥人、瘦人配瘦人，丁羽叔說：「其實唔係規矩，不過肥人把聲厚啲似番原本個人把聲，所以保全配洪金寶好夾。嗰時我哋前面對住個銀幕配音，成龍、洪金寶成班就坐係後面睇住我哋配，配完周不時去消夜食飯。」

同門師弟--鄧榮銾：見佢多過見家人
師兄林保全離開，當年「通殺」成龍電影配音的師弟鄧榮銾（控哥）一樣傷感，他說：「保全突然離開，當然有好大感受，佢係多年嘅戰友，真係好悲痛同不捨。睇新聞先知道原來有咁多人重視配音。呢個係保全嘅貢獻，佢為配音奠定咗地位，亦都話畀我哋知，一個人即使走到多遠，都長唔過生命，大家要好好把握。」

《龍的心》拍住上
提到兩人當年分別為成龍和洪金寶專用配音，控哥笑說：「最多可以話係《龍的心》，佢（保全）聲演我大佬就最多喇。其實當年由無綫合作，大家用同一個休息室，放假又一齊出去偷食（兼職為電影配音），真係見佢仲多過見屋企人。」
自1972年無綫第二期藝訓班入行，控哥坦言仍對配音工作情有獨鍾，問到坊間傳聞當年成龍指定要由他配音，他說：「唔算係指定，不過師傅丁羽當時因為我太新一直反對，吳思遠導演喺《蛇形刁手》開工配音嘅最後一刻先同師傅決定。拍電影嘅人好信邪，所以成龍加入嘉禾電影都帶埋我幫佢配音，到《飛鷹計劃》之後佢轉戰荷李活為止。」
保全叔離世，叮噹或多啦A夢以後都不再一樣，彷彿是對香港人的一大衝擊，不過控哥卻認為配音要令觀眾認不出自己的聲線才算成功，他說：「有次喺廣州搭火車返香港，有乘客話認得我係幫成龍配音。其實把聲唔重要，只要佢打得好睇就得。」

大雄媽媽--陳安瑩：太多回憶
聲演電影版大雄媽媽「野比玉子」的陳安瑩（瑩瑩），17歲加入無綫藝員訓練班時已認識林保全，她說：「仲讀緊藝訓班時，訓導主任揀咗幾位同學去配音組做實習，其實我原本係冇份，但當時被選中嘅同學好唔開心，擔心自己冇機會做幕前，我就舉手話想試吓。就係呢個機會，令我認識咗保全等配音前輩。」                                                                                                        
「佢係好爸爸」
畢業後，瑩瑩被調派幕前做演員，但三十幾年間，仍有兼做電影配音，試過為楊紫瓊、邱淑貞、彭丹等配聲，她說：「做配音好似手作仔逐件計，搵錢唔多，所以好多喺TVB配音嘅同事，日頭返完工，夜晚到凌晨又會為電影配音，多年嚟大家感情好深。」記者要求瑩瑩即場聲演一段大雄媽媽跟叮噹對話，瑩瑩嘗試開口，但腦海中浮現太多過去與保全叔的片段，忍不住眼濕濕哽咽說：「Sorry，真係唔得（錄音），太多回憶。保全好錫囡囡（芷筠），最記得有次我同芷筠去雲南拍《聊齋》，佢就專登請假去探個女，真係一位好爸爸。」縱有萬般不捨，但瑩瑩個性樂天對生死看得好化，她說：「世界點會冇人死，但卡通人物仍存在，點都要搵人頂，頂頂吓觀眾就唔覺。」

ddarcy

報道中的相片

Miracle

good news for share !