隨口噏之《死亡筆記》

blueeyes

討論原載於《爆漫王!!~~好感動啊!》一帖，不過鑑於樓主感覺我們把帖給騎劫了，所以開新帖討論。

歡迎其他對《死筆》有愛的朋友加入！

在主樓貼論文有點不意思…　詳見樓下！謝謝！



追Post請到：

小藍的帖
不明同學的回應1
不明同學的回應2

blueeyes

@不明生物LT

WOW！！！！論文！！！！
我終於搞到其他人都打論文啦～而家有d沾沾～
多謝不明咁好心機回我！！！ 小藍真係好感動！



講返正題，我都覺得《死筆》個粵配麻麻…可能因為個陣黃啟昌同程文意擔正？個人覺得個陣黃啟昌未夠火喉，配起黎講野好似怪怪咁。然後我又一向唔係好喜歡程文意…（被打）

Sor，我一開口就彌海砂，係因為呢個世界太多無理地鍾情於女主然後老屈其他討厭女主既人妒忌女主既女仔。呢件事我幾時諗起都會躁。不過彌海砂最終得唔到月令個情況有d特殊，應該會少好多人鍾意佢鍾意得咁無理…不過我都肯定有d咁既人。什麼「佢為左愛情付出一切令人好感動」之類，我肯定有唔少唔用腦（甚至冇腦）既女仔噏得出…

你講既，關於彌海砂既內容，我基本上同意。尤其係佢係故事裡面既角色同重要性既部分，寫得好好！讚！我同你既唯一分歧應該係我一開始就唔覺得彌海砂話要為左阿月殺佢朋友好衰。我個諗法係咁既～因為佢應該一開始就只係想利用人、唔算朋友，咁殺佢其實都唔係特別衰。我唔鍾意彌海砂反而真係純粹因為佢冇腦。佢有d腦真係幫阿月、做佢左右手，我都冇咁嬲。所以相對下，我冇咁憎高田。但高田其實都係冇咩腦，所以我都唔鍾意。一昧「有愛就行了」既女角真係冇腦得好乞人憎。成套野最鍾意既就係一開始就死左既南空直美，真係人又靚又聰明，正！

另外，我鍾意你形容彌海砂同雷姆這兩個係bug…的確，唔係有d咁荒謬既人出現好難搞死L…但L咁樣死法，我都覺得有d鬱悶。其實佢死都有好多方式死，栽係d咁既人手上，真係仲慘過楊威利俾人暗殺……或者咁算係一種「愛情無法以理性計算」既意思？言下之意，到底是「愛情有時很荒謬」還是「愛情的力量很強大」？我個人就prefer 前者，但應該唔少花癡鍾意後者…（吐血）

佢地係大學相處個段真係好好睇！而且砌「死神喜歡吃蘋果」個段阿月真係幾明顯seven左。不過都唔怪得佢，有時要講大話真係好難，越諗得多有時越易出事…

繼續講之前又再利益申報同澄清少少野先。首先，小小藍只係個對政治零關心的星斗市民，所以對政治完全外行…請多多包涵先。第二係要澄清，抱怨故事沒有交代不代表個人立場。我同樣傾向法治社會，只係對人治有一定同情者……以上。

綜合你講既野，我覺得大致上應該有三點：（1）人會變，如果純粹依賴一個人去管治社會，很可能會出問題（這裡可以多加個1.5，關於繼承人的）；（2）在歷史進程中，社會一直在進步。而我們由人治社會演變成法治社會，證明法治比人治進步、自然也更好；（3）人治社會中，如果領導變成獨裁者就太遲了、必需排除這種情況。

對於第一點，我基本上都同意既。而結合埋第三點之後，都係我傾向法治既理由。其實如果就第三點本身來講其實算是對人治最保守既質疑。因為佢唔係話領導者必然又或者好可能會走火入魔，而係萬一佢走火入魔會點。而我覺得更重要既係，點解要將呢一個情況排除？我覺得，理由係，萬一佢走火入魔，我地唔可以用一d非暴力既方法去解決問題、一定要用革命既方式將獨裁者推翻（假定獨裁者擁有絕對權力）。咁樣既話，相對之下，法治不止比較穩定，而且如果當中有任何一條有問題既話，我地亦有唔駛流血同非暴力方法去解決問題。

附和（1）再加多一點，就是法治比人治都更符合公平原則。因為法律定左咁就係咁，無論咩人犯結果都一樣。但人就有自然的傾向去特別關心身邊既人。如果對錯標準落於佢身上而佢又對某d人特別偏愛，咁好容易出現唔公平既情況。

不過第二點有少少問題，我個人覺得唔係幾岩。係歷史進程中，社會一直在改變，咁係毫無疑問既。但問題係改變唔一定係進步。古希臘既時候，曾經一度有過法治既民主社會，但後來如何進入黑暗时代就不多講啦。如果我地係生於黑暗時代既人，按你既講法，我地就可以話人治社會係一種進步了。當然，事實發展到現在，人治社會的的確確被推翻了。但如果將來，我地既世界發展成《銀河英雄傳說》咁，法治社會再被推翻，咁我地係唔係就可以話人治社會先係進步？如果說歷史發展出來的結果就等於進步，這明顯不合理。我們需要有其他理由去證明法治社會比人治社會更好。（譬如：（1）和（3）…？）

再順帶多提一點…不明你提到機械人個點我覺得有少少問題。如果機械人來執行都唔得好似有d古怪…言下之意好似話只要係人做既都唔得？但就算係法治社會，法律都係由人訂定同由人所執行的。所以，我覺得問題唔係執行既方式，而係我們把法律的地位放得幾高同對佢有幾尊重。用到機械人既Case就係我地點睇個份程序，係程序重要，定係可能寫程序既個個人既諗法重要。如果個情況係，我地共同修定左一份程序輸入俾個機械人，並協議好只可以係大部份人又或者所有人同意既情況下先可以再修正，咁既話，用機械人應該冇問題…？

然後，你提到死刑既問題…可以多口提一下。不過我冇左篇文所以都冇數據係手，只可以隨口噏……我記得好耐之前睇過一篇文講死刑。佢有提過你既問題，佢話我地其實好難用數據講到死刑既效用，因為唔同地方本身個犯罪率有幾高就唔同，互相比較比唔出死刑既效果，就算用同一個地方有死刑前同後來做比較都唔一定反映到。不過有一樣野係明顯既，就係如果d人知道有可能會死，d人就會避免做d有可能被判死刑既嚴重罪行，轉移去犯d較輕既。當然我地冇可能用死刑就排除所有罪惡，我都可以想像就算奇拿最後得勝，新世界同魅上講既一樣，連坐視罪惡發生都叫犯罪都會死都好，係個個世界都依然有人會博自己做衰野唔會俾人發現。但咁唔代表成個制度冇效。即係，我用殺一儆百既方向來叫我手上既人質唔好嘗試逃走，當然咁唔排除最終有一兩個會試，但唔代表我殺一儆百既呢個行為冇效。

所以，我覺得個問題反而係－－個個奇拿新世界明顯唔係最美好既世界。因為d人唔係自願唔做衰野又或者自願做好事，亦唔認為做衰野係真係衰又或者唔認為做好事有價值。佢地所做既野只不過係唔想被殺。咁並唔係進步。最美好既世界應該係人們真正打從心底唔想做壞事、亦打從心底去做好事。但呢種內心既想法並唔係奇拿既社會所可以打做到出黎。

再講返個故事，我覺得《死亡筆記》吸引既地方，好大部份係因為佢對正義呢個問題既探討同帶出左一個好有意思既問題：當你連生死既權利都可以押出去俾你覺得係適合既人既時候，咁仲有乜野你唔可以押出去？

對於L和月的兩種正義，你問我既話，我既態度自然是傾向L。但我感興趣既係，作者會俾出咩理由去否定月既正義。所以，當阿月重新得到死亡筆記既時候，應該係呢兩種正義真正交戰既時候。身為白月既佢完全體會L既正義、唔再只係用以前既月既角度黎睇呢個世界。而當舊既記憶重新被喚醒，完全體會兩種正義既佢最終會因為咩理由而決定邊一種？呢個係我想知既答案…但佢囉返筆記之後連少少猶豫都冇就要繼續實行殺L既大計……令我既期望完全落空。之後自然就係糾結……

順帶一提，我覺得係呢個位，阿月先真正變做黑月…之前既阿月我覺得都唔算黑。殺FBI可以算是為左保護自己而做既低度武力，除左FBI同南空直美，佢好似都冇殺過其他無辜既人了…？低度武力，我覺得你都可以話佢唔岩…（事實上，道德能如我都唔覺得佢岩）…但至少叫有理由可以開脫一下。所以，我覺得呢個階段既月唔叫黑。反而重新得到死亡筆記既阿月就真黑，原因係佢竟然想殺自己朋友……我覺得對於唔識既人，你為左自己既安全而殺佢都算…家人都算…（始終血親唔係自己有得揀，如果話你其實對佢地冇感情都無可奈何。）…但朋友係你自己揀既、點都有d感情……點解佢可以諗都唔諗就殺死自己朋友？？我覺得殺L完全真係完全冇理由說得過去…簡單來講，我覺得「保護自己而做既低度武力」只可以係殺陌生人又或者冇咩感情既人先可以用來做開脫既理由。所以在殺L的情況就用唔上了，而月都係呢個時候先真正成為黑月。不過呢d都係個人對咩行為先唔可以接受既理解唔同者…問題唔大既。

p.s.漏左講，其實我對於阿月從來冇試過殺錯人呢一點有d糾結。其實佢判斷咩人有罪、咩人冇，都用係新聞報導來做標準。但警察時不時都會拉錯人，久唔久都會有冤獄，點解阿月做左奇拿咁多年一個人都冇殺錯過？

菲莉絲

又見小藍論文了

sha1b18

,今日係比人54日

blueeyes

菲莉絲 发表于 2013-3-14 04:51
又見小藍論文了

難得不明同學回左我好長！
所以我好俾心機回返佢！

blueeyes

sha1b18 发表于 2013-3-14 04:54
,今日係比人54日

點解呀？邊個54你！？

sha1b18

blueeyes 发表于 2013-3-14 04:55
點解呀？邊個54你！？

見水帖

blueeyes

sha1b18 发表于 2013-3-14 04:56
見水帖

好！

rangiku

睇到长篇论文 喷了

菲莉絲

blueeyes 发表于 2013-3-14 04:55
難得不明同學回左我好長！
所以我好俾心機回返佢！

個一帖我睇完第一頁已經放棄了... 要睇晒都不知何年何月了