到日本旅遊，"居酒屋"6大禁忌你要知清楚！

angkiusra · 发表于 2016-11-29 09:32:10

早幾日有位日本居酒屋店主上網喺Facebook以「香港人之恥」控訴香港網絡博客劍心，指責劍心行為令人髮指。到底點解有咁強烈嘅譴責呢？原來劍心做左啲被視為禁忌嘅行為，首先佢帶外來食物入人地舖（劍心稱自己食完先入去，但唔小心將關東煮包裝留低咗）；其次係居酒屋入面影相無次次問準店主就㩒左快門；最後一個指控係佢跟友人各自點了一杯飲品便坐足兩粒鐘，被老闆質疑佢地純綷嚟打卡，根本無心欣賞店子的出品。

最後雖然劍心有親自上門向店主謝罪，又向公眾公開回應同交待清楚，但都成為左眾矢之的，有人話佢影衰香港，枉為旅遊達人，亦有人話呢位日本店主早已唔鍾意香港人，佢今次只係唔好彩。

由此可見，去外地旅遊學識時刻注意當地文化，免得被視為「無禮貌又唔識尊重人」嘅旅客係好重要㗎。為免大家重蹈覆轍，今日等小編教下大家入到居酒屋有乜要注意啦！

1. 唔好著穿窿襪

日本有好多居酒屋要除鞋，首次要確保自己對襪唔好穿窿。第二，除鞋後，鞋頭對店門整齊地放好係日本人入室內前嘅標準動作。但有港人習慣用腳除鞋、用腳擺鞋，喺日本就唔好咁做，日本人佢地會覺得好「肉酸」，所以除鞋子後用手擺好就prefect!

2. 先點飲品再點野食

一般係香港餐廳習慣點主食再點飲品料，但喺居酒屋習慣大家一齊叫咗「乾杯！」，再開始吃飯。所以入居酒屋要先睇飲品menu ，等服務生準備野飲，再慢慢討論叫咩餸。

3. 抹手毛巾忌抹枱

日本餐廳通常都會俾一條稱為「おしぼり」嘅手巾仔等食客食野前抹乾淨先用餐，但好多港人抹完手，再抹枱，人地條毛巾點用得翻？咁樣又唔環保又唔愛惜人哋嘅用具，千萬要注意啊！

4. 忌點一杯坐幾粒鐘

呢個絕對係劍心所犯的錯，日本人做事認真係人都知，而佢地都想自己的出品，得到客人的欣賞。但如果客人只點一杯飲品，坐足幾粒鐘，絕對會令老闆黑面。

5. 不準帶外來食品

唔好話居酒屋，日本99.9%的餐廳都唔容許客人帶外來食品，這絕對是不尊重的表現。

6. 忌太濃香水

日本人著重任何細節，對香水呢樣野都相有禁犯。除了大家租和服個陣唔可以噴太濃的香水外，去高級料亭、壽司店或是居酒屋都一樣，佢地認為香水的氣味會影響你自己及其他客人的嗅覺，從而影響食物的質素，並可能沾染到店內環境，為店家帶來困擾。