上咗返唔到轉頭

chinghar · 发表于 2015-12-29 07:16:02

當你錢多到唔知點算嘅時候，就會搵D興趣去燒下錢，可能係靚車、名錶或者係遊艇。如果係遊艇迷嘅話，睇下下面呢D未來嘅概念遊艇，每一艘都設備齊全，上咗船就完全唔使落番船啦。

呢艘名為Star嘅遊艇名符其實，外型似足半粒星，唔講都唔知係遊艇。船身長162呎、高200呎，共8層高，由4部電梯貫穿。總面積超過37,000平方呎，可以容納200人，好似成個ballroom浮係海上面咁。

跟住呢一艘Trilobis65外型好似太空船，而且淨係睇個頂仲有D似Star Wars入面嘅R2D2添。呢艘就唔似頭先個艘咁浮誇，比較實際，佢長65呎、有4層，可以旋轉360度並且容納6個人。佢最大特色係船底嘅一個觀景艙，可以睇哂海底景色，並以太陽能推動，啱曬環保又鐘意大自然嘅朋友。

想黎返個海上探險嘅話SeaXplorer應該滿足到你嘅要求，因為佢為專為探險而設，具備破冰嘅功能，而且可以40日內都無需泊岸補給，無論想到北極圈或者熱帶水域都難佢唔到。

如果覺得頭先幾首都唔夠特別或者唔夠勁嘅話，呢艘Strret of Monaco應該會令你無聲出。與其話佢係遊艇，不如話佢係一艘航空母艦或者一個小國家好似比較貼切，呢艘508呎長嘅艦入面相當豪華，參照世界各大豪華酒店例如Hotel de Paris、Prince’s Palace等，更誇張係連高卡車賽道都有，問你服未。