波羅的海之行——愛沙尼亞篇

geniuz · 发表于 2016-8-31 10:58:42

本帖最后由 geniuz 于 2016-9-8 21:40 编辑

　　一直以嚟，對“波羅的海”嘅了解主要都喺字面上，對佢感興趣係因為《世界零距離》。

　　今次我哋選擇8月出行，因為波羅的海接近北極圈，冬天嘅夜晚會好長，最好選擇夏天尾，日頭比較長，但又唔至於長期都天光。（其實即使8月，都要當地時間晚黑10點先天黑，3點零又天光。）

　　我哋飛到Finnland嘅Helsinki，然後轉渡輪到Estonia嘅Tallinn。十個鐘頭飛機之後即刻坐船，真系頂唔順。

↑愛沙尼亞塔林嘅碼頭

　　我哋租住嘅係Tallinn Old Town嘅一個公寓，叫Old House Apartment，係間石頭屋，按照佢講，間屋有4、5百年歷史。

↑公寓嘅設施同環境都唔錯。有三層，首層係佢嘅餐廳，我哋可以用二、三層。二層有廚房、廁所、大廳、仲有個小房間。三層係個大房間。最搞嘢係三層嘅廁所係完全開放，冇牆圍住，甚至冇玻璃冇莎廉之類嘅嘢，就喺床尾有個馬桶。

　　Tallinn主要遊覽老城風貌。

↑都係歐洲特色嘅街景。教堂以天主教為主，亦有少數東正教嘅。作為歐洲嘅後花園，其實遊客都唔少，但我哋呢類“扁面族”就相對少啲，主要都係“思密達”，但偶爾都有啲講粵語或者煲冬瓜嘅。

　　Old Town有幾個制高點，可以俯瞰全城。（應該話周圍啲屋都好矮）　　

↑Old Town高處望返落去

　　出咗老城其實冇乜景點，就聽講有個叫Kadrioru宮殿嘅地方（卡利柯治宮，google map有中文顯示嘅應該都係比較出名咖喇）。

↑剛出Old Town都仲幾繁華嘅，有嘅大型嘅mall同hotel。但行得幾行，道路就好靜，建築亦開始有啲蘇聯特色。ps：呢度過一個街口就係KGB（克格勃）博物館，講述愛沙尼亞被蘇聯統治時期嘅黑暗歷史。

　　Kadrioru宮殿喺一個叫做Kadrioru公園裡面。Kadrioru宮殿係沙俄佔領時期起嘅，本來作為沙皇嘅夏宮，不過後嚟好少用。

↑其實所謂宮殿，都係好鬼細嘅，大陸求其一個乜嘢度假村都大過佢。而家宮殿入面係個藝術博物館。

　　Kadrioru公園都幾大，如果時間充裕，散下步，放鬆下身心，係個好好嘅去處。

↑Kadrioru公園，可惜當日去嘅時候落雨，雖然有遮，但都有啲狼狽。好在離開嘅時候開始放晴，心情亦舒暢好多。

　　行出Old Town嗰日，先正式睇下Old Town嘅正門。

↑Old Town門前嘅雙塔

　　補返啲飲食圖片

↑一間位於Old Town裡面，名為Sushi Silk嘅鋪頭，正宗就唔正宗咖喇，勝在比西餐平。

↑喺Old Town外嘅mall，有間叫Chopsticks嘅中餐館，啲嘢食都ok，又唔貴。雖然店名叫chopsticks，但就冇chopsticks提供，有啲掛羊頭賣狗肉嘅感覺。

↑朋友介紹嘅鹿肉，但一睇個menu，太貴唔捨得，都係冇入去。

↑CRU（全名唔知叫乜），Old Town裡面一家比較正宗嘅西餐，啲嘢好好食，尤其係個甜品非常正。不過亦比較貴，我哋5個人（其中一個係小朋友）食咗168歐元
　　Estonia寄出境要1.5歐元郵資。Postcards喺老城有好多，不過最平系Information Center，而且款亦唔少，只系衰在冇郵票賣。郵票要去郵局或者書店先有。

↑ tallinn市區嘅郵局

↑ 超市有豉油賣，當然就物離鄉貴。

↑ old town嘅超市買嘅，雪櫃磁鐵，有d碎amber

↑西聯郵局買嘅stamp

　　喺Tallinn嘅最後一日，一早就去到中央車站，坐預先訂好嘅嘅大巴，向Latvia（拉脫維亞）出發。

↑ 好多好似系遊學嘅人坐同一部BUS

下一站：拉脫維亞篇：https://www.dranime.net/thread-38750-1-1.html