女友話冇樓唔結婚李嘉誠叫你趁後生搵第二個真係咁易？

sky000 · 发表于 2018-3-21 12:52:41

李嘉誠作為大地產商商家，竟然唔係叫你點都要買樓，而係叫你飛咗有樓先婚的女友，簡直係震撼全香港七百萬人，估佢唔到，但老老實實，真係咁易？

「冇樓唔結婚」好唔正常

要抽空一句說話去講，當然奇奇怪怪，不如了解李嘉誠當初何出此言吧女，其實當時是有一名男大學生指出，他的女朋友「冇樓就唔同佢結婚」，李嘉誠指如果自己是那位男大學生的話，就情願向女友講：「不如你趁後生，快啲搵第二個喇！」李嘉誠覺得大學未畢業就已經諗「冇樓唔結婚」係好唔正常。

大學生都要排定公屋

聽落好正義，但想深一層，這一種「唔正常」，根本就正常不過呀！事實上，今時今日，你可能應該考完DSE第一日開始，就應該排公屋呀！你問問今日的大學生，可能有部份已經打算入表排單人公屋，這的而且確已經是新趨勢，就算他們不是真的希望可以成功入住公屋，有綠表在手，都可以方便將來容易一點抽居屋嘛！事實上，如今的大學生，一早就要開始諗樓的問題，還要等畢業出來拎萬一蚊糧乖乖儲錢？一世都可能買不到樓了！再問問十年前的大學生，他們若然到今天仍然未買到樓的話，好可能都後悔當年無抽公屋！今時今日90後、00後畢業後要買樓的難度，比80後更難，因為人工與樓價的差距，已經大到一個離譜的狀態，一個一萬蚊人工的年輕人，望住四百萬以上的樓價，不在大學時已經預備，那就真的太遲了！

自己一個更開心

當然，如果有一個女友在你未有能力的時候，已經設下這樣的難關，拍多幾年拖，你人工都未有二萬，買樓遙遙無期，可能最終都會分手，長痛不如短痛，早點分手也沒分別，但真正的問題是，飛咗呢個，下一個又係咁，咁又如何是好？不過，如果你決定單身十年，利用五年做毒男慳返拍拖錢戲都唔睇，都可能在28歲的那一年，儲到九成首期，但到時應該都沒有400萬以下的樓，想做九成按揭都無咩可能，然後，你發現其實自己一個更開心，唔駛李嘉誠講。

好多人三十歲都無樓

不過現實的社會係最慘係，好多人到三十歲，都仲未有樓，身邊那一個女友都三十歲了，是否真的無樓唔結婚？你到底係咪應該飛咗拍拖八年的女友？的確，「有樓先結婚」係好怪的諗法，租樓一樣得。不過租樓在香港社會而言，簡直係二等公民，租金貴不在話下，萬五六先得300呎，食咗半份糧都唔駛儲錢，不過都算，最灰係隨時被業主瘋狂加租之餘，更可能一年又趕你走，想住得安穩都難，在香港要求安穩一點，的確好難。

在香港生活無樓的你，也請珍惜一下，身邊那位肯跟你一齊捱的女友，你已經係最幸福。