如果中咗億元六合彩　十樣緊要嘢不可不知！

kplam · 发表于 2016-3-2 01:08:19

投注額破歷史紀錄的「億元」六合彩很快就攪珠，買得六合彩，拎住張彩票，你一定係信心十足。好嘞，叻，中咗1億嘞！夢想成真之餘，有十樣嘢一定要提提你。

1、買間上市公司「錢搵錢」
中咗獎，除咗自己同家人享受外，亦可以長遠啲「種樹」畀下一代「乘涼」！股市跌成咁，已經有幾十間上市公司市值唔夠1億，多數集中喺創業板，當中不乏工業、科技、金融、石油化工、電子、食品、零售公司，要乜有乜，最平市值係1千萬左右咋，不妨尋吓寶，買間上市公司玩吓，既可以過吓癮做老細，又可以創業興家，錢搵錢，隨時1億變幾十億，甚至百億千億，仲諗上車咁簡單？買起成條街都得啦！

2、請專家教路　唔好亂使錢
中咗1億，一時間唔知點好？不妨聽吓專家意見。「東網財經」上月採訪了兩位理財專家，清晰地教路點樣分配好1億資金，令你印印腳唔使憂。當中包括1/4留作退休；1/4用於應付3至5年開支；1/4實現夢想與心願，包括創業；1/4投資。

3、高調買iBond
中咗成億想錢搵錢，但又未至於想創業、專家意見又「流流地」咁點好？政府咪有隻「穩賺」嘅投資叫抗通脹債券(iBond)囉，點衰都有1厘息，一定唔蝕，仲可以迫自己「儲」幾年錢，唔使驚使大咗！值得諗諗啦！

4、睇實發展商新盤部署
買得六合彩，好多人嘅中獎目標一定係買層樓享受吓！有成億仲諗二手樓咩。不過，又唔使急喎，緊記買樓係投資之一，要睇清睇楚邊區發展潛力最大、邊區未來有好多供應(供應多樓價難升啲)，仲有係今年發展商大把新盤，記住做好研究，增加勝算。

5、第一時間深呼吸　第日準時返工
講完投資，都要學吓調整「離地」心態。外國有研究發現，普通人未必能抵受得住「天降橫財」，最終因橫財而變窮的大有人在。中咗1億，第一時間唔好周圍唱，係要深呼吸，令自己知道世界冇變，一切猶如今晚9時半前咁，第2日如常準時返工，不要衝動辭職，直至計劃好點用啲錢先。唔係「眼紅」你有錢，係有研究實例，真係唔好辭工住。

6、返工盡量克制　唔好眼神閃縮
第日照常返工後，記住呢個世界除咗你之外，其他一切如常，所以緊記要好似紀律部隊咁「保持克制」、「罵不還口」，平時勤力開就唔好突然變得好hea，係都慢慢先hea...當你的心態由「離地」調整到「落地」後，就可以諗吓點實現夢想...

7、繼續同朋友講股講樓
中咗六合彩應唔應該唱通街？除咗「千億新抱」外，你千祈唔好做「大喇叭」！外國研究發現，除咗自身安全可能有問題外，最重要係影響你社交關係。緊記做返自己，得閒哭吓股喪、繼續狂寸啲「財演」冇料到、怨吓樓價貴到冇朋友。切忌突然高調話500呎咁cheap，要買洋房。

8、去旅行記住坐經濟艙
中咗巨額獎金，就算唔係頭獎，或多或少都想獎勵吓自己外遊開吓眼界，如果冇人知，就點都得啦。不過，如果成班朋友去旅行，而你平時又坐開經濟位嘅話，就真係要諗諗唔好高調話自己坐唔慣喇...費事畀人問長問短，陣間「爆響口」就自己諗後果喇...

9、買車買勞前諗吓藉口
雖然話有1億買部車、戴隻勞唔過分，但「忽然富貴」一向都係要避忌吓，始終八卦友多籮籮。如果要買嘢獎勵自己，最好諗定點回應，例如事先張揚話炒中隻新股賺到少少錢、甚至買中隻輪證爆升...

10、搵律師立張「平安紙」
贏咗億億聲，霎時間會唔知點處理，其實可以搵律師幫你成立信託基金，有個信託人去幫你管理筆錢。「你可以Set定啲錢點用，例如每年攞幾多做自己嘅開支，甚至安排基金自動將5%收益作為慈善用途」等。
最後，正所謂：「唔怕一萬，至怕萬一」如果突然間有事，開心得滯「走咗」，咁多錢，或會有人爭，可以諗吓寫定「平安紙」，處理好財富傳承問題，避免有咩爭拗...