本帖最后由 allenyu 于 2022-5-20 17:36 编辑
奇異博士2：失控多元宇宙已經上咗畫差唔多兩星期，要入戲院睇嘅人應該入場，唔知各位師兄對套戲有冇咩意見？不妨講出嚟互相交流下！
小雀就用咗兩日時間打咗細細段影評，如下:
呢個故事係關於一個「發仔瘟嘅癲線巫婆，諗住殺死並拎走由唔開心法師保護嘅驚青靚妹擁有嘅能力」。 以上就係Doctor Strange in the Multiverse of Madness嘅故事大綱，呢一套野係上映之前就被人議論紛紛，仲比人話係香港推高打針意慾嘅一套戲，但上映之後好似有d兩極化咁，究竟呢套戲係好定係壞？以我兩次觀賞後嘅感覺嚟說，呢套以Marvel MCU嚟講都算一套較中下嘅作品。以分數嚟比喻，應該5.5/10去比呢套有D公式化嘅電影。 1. 劇情 係呢套戲嘅劇情嚟講，推進都算明快，一開頭已經有新角色嘅登場，而且其中嘅CG仲多過Doctor Strange第一集，係好適合一D鍾意睇大量視覺效果嘅觀眾。我覺得今次劇本同以往Marvel片差唔多，都係一定要阻止Final Boss果類，就還可以。不過我個人覺得出事嘅反而係今次導演Sam Raimi。諗住佢導過初代蜘蛛俠，呢次實冇問題啦，點知出哂事。劇中有好多唔少佢嘅風格係入面，例如一開頭隻八爪魚怪比奇異博士插眼珠出嚟果part，的確幾有風格。不過Phrase 4 Marvel好多套戲都玩唔同風格，今次Marvel明顯就係玩驚悚風格！睇完之後，我明白到超級英雄係同驚悚風格係好格格不入架，入面D Jump Scare 你明知佢一定係果d位嚟嚇你，你一早知，連D角色自己都知，但係就唔知點解佢哋都一定要企定定係度比人個女巫嚇，例如:水倒影、防爆門……果d位，完全唔嚇人之餘，都唔知應該驚定應該笑。 另外，我其實懷疑套戲係咪應該叫《奇異博士2：失控838宇宙》？套戲話就話失控多元宇宙，不過都係多數時間都係Marvel MCU主宇宙同838宇宙，其他嘅宇宙表現係同預告一樣一瞬而過，真係唔太睇得仔細，好似當呢d宇宙好似當戲中彩蛋就算，我認為可以穿越唔同宇宙期間留多一兩分鐘。穿越多元宇宙同第一集古一帶奇異博士穿越唔同次元都一樣咁好似萬花筒，都幾有觀賞性嘅。 我覺得套戲設定都有d無謂，開頭講到本「黑暗神書」加埋Wanda呢個組合變成嘅Scarlet Witch係勁到跳哂掣，跟著了又話得本「維山帝之書」可以同「黑暗神書」對立，點知本「維山帝之書」除咗係識發光之外，唔夠一分鐘就比人燒咗。跟著Doctor Strange又係要用返「黑暗神書」同Wanda對抗，真係有D哂咗本「維山帝之書」，真係唔知呢本書係套戲有咩存在？另外，我亦認為戲中有D場面都幾好笑。其中一樣就係套戲入面，Doctor Strange同Sinister Strange對決點解會用音符嚟決鬥架，雖則第一集描述奇異博士鍾意樂理，但都唔洗玩到好似《功夫》入面六指琴魔對決咁樣，令人好出戲。而且，838號宇宙Wanda被主宇宙Wanda「Dream-Walk」上咗身，捉到America Chavez之後想扔佢過返去主宇宙果個位，玩到好似多元宇宙嘅出入口好似轉台咁樣，莫名其炒嘅笑點，令我完全完成忽略咗果陣嘅緊張感！ 2. 角色 對於呢套戲，我覺得某D角色嘅描寫其實都有d幾平面，唔夠立體。 首先，講下主角-奇異博士Stephen Strange，呢套野其實都冇乜點樣去描寫佢成長，反而描寫係佢對自己做法有乜改變。Stephen一開頭參加婚禮就比自己前同事質疑”Thanos彈指事件”嘅做法。不過Stephen都係認為「幾個人犧牲好過犧牲半個宇宙」，同其他多元宇宙嘅Doctor Strange一樣。之後果段情節我覺得幾有意思，佢個前女友Christine Palmer係婚禮度同佢傾計，傾到分手原因，係因為Stephen「永遠都要做操刀果個，呢點令佢尊敬Stephen，但無法令佢繼續愛Stephen」。奇異博士呢點幾貼合現實，就係每個人控制每一件事，就想令到件事控制變得完美，但往往就會忽略咗身邊嘅人嘅感受。最後，Stephen係各個字宙見到自己鍾意「操刀」嘅性格，自己嘅自大造成各種災難，係最終戰放手比America Chavez同Scarlet Witch隻抽(雖然一樣唔夠抽)，但唔係再好似Defender Strange或者其他奇異博士咁堅持以前嘅做法，打算吸收同殺死America Chavez。呢點係令奇異博士嘅性格同心境有所改變，都係一個唔錯嘅看點。 之後到尾段果陣，Stephen比開咗第三隻眼嘅Sinister Strange問「你開心嗎？」，呢個係Sinister Strange以前參加Christine婚禮，Christine問佢嘅問題，而佢當然好肯定答「我而家係地球最勁魔法師，點會唔開心？」。跟著就話自己完咗婚禮之後好孤單咁坐係至聖所，好唔開心，覺得主宇宙嘅Stephen同自己一樣。呢點我又覺得有D有趣，同現實生活一樣，例如比人問你而家開心嗎？多數人都一定答自己好開心，同Stephen覺得自己拯救咗宇宙，自己會開心一樣，但當你自己問返自己呢個問題果陣，可能同奇異博士一樣都係有一種空虛感，回答自己開心係一種自欺欺人嘅答案。但自己又可以點從生活獲得快樂，從而令自己開心？呢個係一個幾令人值得反思嘅問題！ 奇異博士係最後整返好隻錶，好明顯係想觀眾講表達自己已經對Christine呢段感情move on咗，但如果有睇WhatIf劇集，就知道佢為咗Christine Palmer可以去到幾盡，連Absolutely Point都要不惜一切破壞，令佢復活，有冇真係咁易move on？雖然片尾都出現咗佢係漫畫中嘅未來老婆Clea，好明顯第3集係講佢。 跟著想講下America Chavez呢位新角色，係新角色嚟講係幾唔錯，可惜著墨不足，只係講佢一開頭因為開錯傳送門而導致失去自己兩個媽媽，之後驚咗自己能力，只可以係恐懼果陣打開傳送門。之後亦只係係最終戰上比奇異博士灌咗兩句心靈雞湯，就可以解開自己心魔嘅恐懼，有冇真係咁易、咁順利？ 然後亦講兩句Mordo呢個角色，因為係呢集登場嘅只係838光明會宇宙嘅角色，完全同主宇宙嘅Doctor Strange扯唔上任何關係，好似一個新角色咁，浪費哂上一集片尾留低嘅期待！在電影嘅對話中，主宇宙嘅Doctor Strange都知Mordo成日追殺佢，咁呢d細節Marvel係未講定已經skip咗，真係要等下先知。 接下來呢個角色我認為係呢套戲嘅最大問題，應該都幾無可非議-Wanda Maximoff 。佢唔單止係呢套戲表現平面，而且角色行為亦都對應唔到前面嘅電影同劇集。佢係反派一開頭我都已經接受咗，但行為動機令我懷疑佢係咪同一個角色？佢要捉America Chavez嘅原因係驚佢對孖仔有任何意外或者疾病，就去另一個宇宙搵解決方法，我睇緊已經R爆頭。咁你完全冇必要殺咗America Chavez，你叫佢開個傳送門比你咪得？又或者你都已經咁強大，不斷「Dream-Walk」搵方法咪得？橫掂點做都有機會令宇宙發生大碰撞，洗乜要同DoctorStrange關係去到咁僵，又要去搞到咁大陣仗。 其次，我亦唔明Wanda無端端會變咗一個發仔瘟嘅痴線婆？呢套野講到明係Wanda Vision之後嘅故事，而亦到有一兩句提到Westview，有睇過套劇嘅都知Wanda係想要組織一個家庭，而唔係剩係想要對細路就算數，加上套劇明明Vision都已經變咗做白Vision，恢復咗記憶，唔明點解唔搵返Vision組織返一個家庭？定係其實Wanda唔記咗呢件事，中咗博士「卡夫卡咒語」？套劇片尾亦都有佢對孖仔係本「黑暗神書」叫救命，但呢套戲又冇咗件事，變咗發仔瘟係咁搵仔，有冇轉得咁快。聽聞導演Sam Raimi話冇睇過Wanda Vision呢套劇集，咁Marvel咪真係首次劇集同電影融合衰咗。搞到呢個黑化英雄冇一個合適理由令觀眾去代入，從而去理解佢嘅行為。 不過，係最後同對孖仔見面果陣，係有d明白佢果種傷心，即使做咁多野，自己搞到滿手鮮血，都想成為一個母親，但見到對孖仔對自己嘅恐懼，加上佢哋都仲係望住838號宇宙嘅自己，明白到自己永遠都冇可能做到佢哋嘅媽媽。呢個位又做得幾好。最後佢用自己能力破壞哂所有多元宇宙嘅「黑暗神書」，係咪即係說明Wanda Maximoff有不同嘅變體係多元宇宙，但Scarlet Witch係多元宇宙只有一個？ 3. 客串角色 片尾 呢套野都好多客串角色去參演呢套戲。 首先講下「秒殺光明會」，有Captain Carter、Captain Marvel果d演員出現果陣，入戲院都已經估到架啦，所以都冇乜驚喜。再加上我冇睇X-Men同異人族劇集，更加對果兩位英雄冇感情或情懷可言。後尾見到神奇4俠嘅神奇先生出場，人選當然傳咗好耐嘅民選神奇先生John Krasinski，我都唔太意外。其實我係比較想見到舊版神奇4俠同Tom Cruise版嘅Iron Man出現，但係我係戲院見到Tom Cruise嘅原因，只係因為套戲開始之前Top Gun 2嘅預告片。不過，之後睇到秒殺情節出現，我都覺佢哋冇出現真係萬幸！雖然話Scarlet Witch嘅能力係勁到跳哂掣，不過可唔可以D英雄捱多陣，起碼同Scarlet Witch苦戰一輪先死，而家搞到客串演員演出嚟嘅英雄好似卒仔一樣，睇果陣好似睇緊《破壞之王》「斷水流大師兄」嘅既視感，「在場各位都係垃圾」？真係浪費哂D英雄角色，雖然首週睇到「光明會」嘅出現，但都冇人好似睇No Way Home咁睇到咁興奮，叫哂出嚟咁濟。 到第一個片尾，見到由Charlize Theron飾演嘅Clea出現，我個心都算定d，雖然之前傳Charlize Theron係好大機會會出現，但角色未知，而且之前一直又傳係《哈利波特》飾演妙麗嘅演員Emma Watson做Clea角色，我已經心諗年紀差會唔會同Benedict Cumberbatch差太遠。不過而家已經確認，都覺得Benedict Cumberbatch同Charlize Theron嘅應該係未來呢個組合都會幾有火花。 到第二個片尾，見到導演Sam Raimi嘅長期拍檔BruceCampbell飾演嘅小販終於結束三星期嘅咒語，而且仲講”It’s over.”，呢個雙關語同時話套戲已經完，呢個笑點都幾好笑。(雖然有人話呢個片尾浪費時間) 4. 總結 總括而言，雖然套戲戲路有少許公式化之餘，但劇情都唔會太過乏味，加上有CG嘅加持，增加咗電影嘅刺激感。唯一美中不足嘅係角色嘅動機太過流於表面，令到未能足夠情感代入場景之中。 呢套戲如果你係一直有追空MCU嘅Fans就一定點都走唔甩架啦，點都要入場睇。不過如果你係即興，人睇你又睇嘅話，我就唔會太過推薦，因為呢套戲剩係得CG吸引到呢類觀眾，劇情、角色之間嘅衝突，一個唔知前文後理嘅故事，真係好大機會瞓著。不過有多餘錢洗下，又有多餘時間，都姑且可以入場一看。 (覺得好悶唔想睇嘅，可以直接交流意見！) 順路玩埋投票，以下2套，覺得邊套好睇d？
| 
[复制链接]
雷达卡
提升卡
置顶卡
沉默卡
喧嚣卡
变色卡
显身卡
成长值: 7745
